Nibisita sa lokal nga panggamhanan sa Butuan sila Coast Guard (CG) Commodore Christopher Meniado, Commander sa PCG District Northeastern Mindanao, ug Commander Alfwell Saarenas, Station Commander sa PCG Station Agusan Del Norte ug nakahinabi nila si Vice Mayor Lawrence Lemuel Fortun. Usa sa gihisgutan sa ilang pagbisita ang yuta nga pwedeng tukuran sa ilang bag-ong opisina ug nanghinaut nga matabangan sila sa LGU-Butuan sa pagpangita aron plastar ug hapsay na ilang kabutangan. Gawas niini, nahisgutan sab ang proyekto sa LGU-Butuan nga International Seaport sa Barangay Lumbocan asa kinahanglan ang hugot nga suporta ug presensya sa PCG kung ugaling maimplementa na kini. Sa gihatag nga mensahe ni Vice Mayor Fortun, dakong tabang sa syudad kung ugaling matuman ang mga plano sa LGU kauban ang PCG tungod mao kini ang ahensya nga naga responde sa panahon sa kalamidad, naga patuman sa mga balaod, ug naga siguro nga hapsay ang kadagatan ug ang atong Mighty Agusan River. Tahas sa Philippine Coast Guard nga mapatuman ang international ug national nga balaod sulod sa atong nasud labi na sa mga bodies of water.