Giila sa city government sa Butuan pinaagi sa City Agriculture Office ang padayong commitment sa mga vegetable farmers ug vendors pinaagi sa Agriboost Awarding Ceremony of Farmers and Vendors sa Robinson Place Butuan kagahapon sa hapon. Kini mao ang paghatag og cash ug certificates sa mga mag-uuma gumikan sa paningkamot niini nga makasupply og gulay nga ibaligya sa mga vendors sa merkado. Usa sab kini sa paagi ni Mayor Ronnie Vicente Lagnada sa pagpadayag sa dakung pasalamat ug pagdayeg sa paningkamot sa mga mag-uuma ug vendors. Apil sab nga giila ang paningkamot sa upat ka mag-uuma nga sila Sheila Maglines sa Barangay Nongnong, Victor Carampatana sa Barangay Bit-os, Joesie Duranggo ug Jovanie Samosino sa Barangay Anticala nga dunay natalang pinakadaku og volume sa delivery sa gulay sa agrihub facility asa dinhi usab mopalit ang mga vendors aron ibaligya sa merkado. Gidayeg usab sa city government sa Butuan ang padayong commitment sa vendors nga padayong nagdasig ug nanawagan sa mga-uuma nga mas daghanon pa ang ideliver nga gulay aron wala nay mo-angkat pa sa ubang dapit. Bout ni Mayor Lagnada nga mudako ang supply sa pagkaon sa syudad ilabina ang gulay tungod mao kini ang nag-unang kinahanglan sa tanan aron makabaton og insaktong nutrisyon. Gani, gihatag sa opisyal ang hugot nga suporta pinaagi sa technical, trainings, materyales ug ekipo aron sab dili madak-an sa gasto ang mga mag-uuma ug makarecover kini human sa mga nasinating pagkapakyas sa pag-uma gumikan sa dili masayran nga pabag-o bag-o nga panahon. Nanghinaut usab ang City Agriculture Office nga padayunon sa mga mag-uuma ug vendors ang commitment sa agriboost project uban sa pagpasalig nga anaa kanunay mopaluyo ang lokal nga panggamhanan alang sa mga kinahanglanon sa maong sektor. Kini nga kalihukan kabahin sa pagsaulog sa Balangay Festival 2023.