Gibida sa natigayong Womens Fiesta Caravan ang nagkadaiyang mga produkto nga gama sa mga kababayen-ang Butuanon nga anaa sa City Hall Ground sugod kaganinang buntag. Hugtanung gisuportahan sa City Government sa Butuan pinaagi ni City Councilor Cherry May Busa, Committee Chairperson sa Family, Womens and Childrens Welfare and Gender Equality. “Akong mensahe alang sa mga kababayen-an nga padayong magmalig-on, magmalipayon, padayong muengage sa mga programa sa komunidad alang sa pagpalambu sa pamilya, pagpalambo sa kaugalingon ug sa atong nasud.”pahayag ni Konsehal Cherry May Busa. Si Armie Cepeda, Womens President sa Barangay Agao ug Nenita Baybay sa ButuanOn Producers Association Incorporated kun BOPAI padayong nagsuporta sa mga kalihukan sa mga kababayen-an ilabina ang pagsalmot sa mga caravan ug trade fair alang sa dugang income sa ilang tagsa-tagsa ka pamilya ug sa ilang mga kaubanan sa pederasyon ug asosasyona aron usab maila ug mapromote ang mga lokal nga produkto. “Giawhag nako ang mga kababayen-an nga magtinda diri dalhon ang ilang mga produkto aron makita sa tanan nga ang mga kababayen-an duna gyod skills ug talent sa paghimo sama niining lain-lain nga produkto. Pasalamat sab mig dako kang konsehal Cherry May Busa nga kaming mga kababayen-an giaghat ming makita among mga talento.” ang pahayag ni Armie Cepeda. ”City Trade invited us the good thing is the booth is free so we can promote our local products.” Sumala ni Nenita Baybay. Giawhag ang tanan nga suportahan ang Womens Caravan. Duna kini lamiang pagkaon nga pang snacks ug barato nga pangpaniudto, cakes, lain-lain produkto nga pangpasalubong, accessories, skin care products, panregalo nga bulak, bags, senina nga pangbata, used clothes ug uban pa. Ang Fiesta Caravan nahimong malampuson sa pagtinabangay sa GAD Program sa City Education Literacy Scholarship Office CELSO ug City Trade Industry and Investment Promotion Office CTIIPO sa tema nga BABAE:Bangon Babaeng Entreprenyur. Mulungtad ang Fiesta Caravan hangtud adlaw’ng Byernes , Marso 10 gikan alas otso sa buntag hangtud alas singko y medya sa hapon.