Pasado ang Butuan City sa 2022 Good Financial Housekeeping. Ang resulta gibase sa assessment nga gipahigayon sa Bureau of Local Government Supervision ilawom sa Department of the Interior and Local Government kon DILG. Ang Good Financial Housekeeping usa ka core component sa Seal of Good Local Governance kon SGLG, asa diri gitan-aw ang mas komprehensibong ebalwasyon sa capacity-building efforts sa usa ka Lokal nga Panggamhanan. Kini ang gigamit nga assessment tool aron makita ang performance sa local government hilabi na sa hisgutanan sa transparent reporting sa public budget ug expenditures. Subay sa DILG Memorandum Circular No. 2014-39, ang GFH nagpakita nga ang usa ka LGU nagsunod sa accounting ug auditing standards, rules ug regulations. Gikalipay sa kinatibuk-ang pwersa sa Lokal nga Panggamhanan sa pagpanguna ni Butuan City Mayor Ronnie Vicente Lagnada ang nasangpit nga pag-ila tungod nagpakita kini og validation sa tanang efforts sa paggasto sa budget ug finances nga adunay transparensiya sa paghatud sa mga programa ug serbisyo para sa tanan.