Aprobado na ni Mayor Ronnie Vicente Lagnada ang Butuan City Inter-Agency Council Against Online Sexual Abuse and Exploitation of Children Ordinance nga gipangamahan ni City Councilor Cherry May Busa. Kini nga ordinansa base sa Section 2 RA no.11930 o mas naila sa Anti-Online Sexual Abuse and Exploitation of Children OSAEC ug Anti-Child Sexual Abuse o Exploitation Materials CSAEM Act. Kini aron mahatagan sa saktong proteksyon, suporta ug saktong pag atiman ang mga kabataan ug kababayen-an nga nakasinati sa mga nagkadaiyang klase sa pagpangabuso. Mahinumduman nga gipasalamatan ni Vice Mayor Law Fortun si City Councilor Cherry May Busa sa pagpangusog nga mapasa ang ordinansa aron mas mapalig-on ang pagpatuman niini tungod sa saktong probisyon ug ang pagtinabangay sa mga ahensya sa rehiyon. Kahibaloan nga si Vice Mayor Lawrence Fortun ug kanhi usab Congressman ang nahimong author sa National Law nga Anti OSAEC Bill. Ang pagmugna sa Butuan City Inter Agency Council Against Online Sexual Abuse and Exploitation of Children Ordinance suportado sa tibook pwersa sa sangguniang panlungsod sa pagpanguna ni Vice Mayor Law Fortun.