Makadawat og cash incentives gikan sa city government sa Butuan ang Butuanong si Casey Angelique Busa Ty human nag top 9 sa Nursing Licensure Examination nga gipahigayon sa Professional Regulation Commission kun PRC niadtong Nobyembre 12-13, 2022. Nagkantidad sa 10,000 pesos ang cash incentive nga giaprobahan ni Vice Mayor Lawrence Fortun pinaagi sa SP Resolution No. 006-2023 nga gipangamahanan ni City Councilor Joseph Omar Andaya, Committee Chair on Education ilawom sa SP Ordinance no. 5545-2018 o mas naila nga Butuanon Topnotchers Ordinance nga aprobado ni Mayor Ronnie Vicente Lagnada tungod sa dakong dungog nga gidala niini sa syudad. Si Casey Angelique Busa Ty, residente sa Barangay Ambago sakop sa syudad sa Butuan nga produkto sa usa ka iladong unibersidad sa Cagayan De Oro City. Gihingusgan ni Mayor Lagnada nga maila ang mga kalampusan ug mahatagan sa pasidungog ug pinansyal nga suporta ang mga mag topnotcher sa licensure exams aron makahatag kini og kadasig sa ubang kabataan nga maningkamot sa pagtuon bisan paman sa mga kalisod nga nasinatian.