Dalan paingon sa Sumile Zoological and Botanical Park gi-turn over

BUTUAN CITY– Gipangunahan ni Congressman Lawrence Fortun ang Turn-over ug Ribbon-cutting ceremony sa kapin usa ka kilometrong access road padulong sa Zoological and Botanical Park sa Brgy. Sumile adtong Pebrero 12 sa buntag.
Natuman ang konstruksyon sa gipangandoy nga road concreting pinaagi sa TRIPPC kun Tourism Road Infrastructure Project Criteria. Naggikan ang pondo niini gikan sa Congressional Office ni Rep. Lawrence Fortun, DOT Caraga, DPWH-BCDEO ug Lokal nga Panggamhanan sa Butuan.
Sa mensahe ni Congressman Fortun, gisugyot niini ngadto kang Sumile Punong Barangay Dominador Paglinawan nga i-develop pa pag-ayo ang Zoological and Botanical Park aron maaghat ang mga turista sa pagsuroy. Dugang pa ni Fortun, mamahimong ipatuman ang pagpangayo og entrance fee aron ang matigum nga kwarta maoy gastuhon para sa maintenance sa parke. Dugang pa niini, mamahimong ibaligya sa parke ang mga pagkaong iya sa Sumile aron sab makabaton og dugang nga kita ang Barangay.
Atraksyon karon sa Sumile ang gatusan ka mga unggoy nga gipasigarbong hing-amigo sa mga tawo. Kada adlaw ganaug kini sa ilang puy-anan sa bukid ug gapangayo og makaon sa mga residente nga anaa daplin sa dalan.
Sa gipahigayong turn-over and ribbon-cutting ceremony mitambong usab sila DOT Caraga Regional Director Ma. Ana T. Nuguid; Assistant District Engr. Ervin P. Salang sa DPWH-BCDEO; City Councilor Cherry May Busa, Chairperson sa Committee on Tourism; Councilor Ferdinand Nalcot ug Councilor Omar Andaya.
Ang nasangpit nga aktibidades gipasiugdahan sa City Tourism Office sa tumong nga mas mapalambo pa ang turismo sa dakbayan.

Get in touch with us

Contact us

Republic of the Philippines

Office of the City Mayor

J.Rosales Avenue, Doongan

Telephone no.      (085) 342-3074

Fax No.                  (085) 225-5737

Email Address:   cmo_butuan7@yahoo.com

Education - This is a contributing Drupal Theme
Design by WeebPal.